16-Nov-2011 投資思維

今天有一項操作。

增持 4% 750。

有些人經常鬧財演，但自己又表現得十足十財演，幾乎化身成為火xx二世。用一些好運成功的例子去吹噓誤導讀者，但那些失敗蝕足9成以上的例子又不敢展示人前。賭十次有一次中，有幾難呀！！大量賭輸的例子收收埋埋，履歷表做得靚一靚又如何，連自己都不敢面對，還去教育別人。人最怕就係跟錯師，學壞手勢，真係咁就一世！！呢個世界真係好奇怪，40年以上投資成功的人不去學，反去信奉一些網上吹左幾年水既人，理由未又係一個字，懶。大前研一講的低IQ年代真的冇錯，很多人都不想用腦，見到有個人吹得下水識做份靚靚履歷表出黎就以為好勁，跟佢包無死實發達，點知.....................。

再講個故事比大家知，當年每個買迷債既人都以為自己係百份百投資，唔係賭博，結果事後很多苦主都話自己係投資唔係賭博，要求百份百賠償。今天買思捷既人又係以為係投資，其實未又係去賭，份業績都大字標題話比你知未來好有可能攪唔掂連息都可能唔派，你都敢去買的話，唔係賭係乜？又有好多人以為自己係投資，但係事實情況又係業績表明話你知好唔掂，你都要希望佢未來一片光明升十倍，沒有實在事實根據的希望，唔係賭又係乜？

從來投資就是用腦思考去爭取合理回報的活動，不用腦思考，不積極爭取合理回報，以為買左就可以唔使用腦等發達，真係衰過去賭場賭錢，因為去賭場賭錢起碼可以即時知道自己賭輸左，但係以為買左股票就唔使理，結果十年後先發覺自己賭輸左，你地話係唔係慘過即時知道自己賭輸左。個個都識話自己時間有限，但一去到投資就好似時間無限咁，十年唔得二十年，二十年唔得三十年，實有一日發達比你睇？

很多投資者都因某些意識型態局限自己的思維，投資不是政治或宗教，投資是先科學後藝術，先以科學性思維去考慮現在，再以藝術性思維去想像現在如何支持未來，如果只想像未來不考慮現在，這就是名副其實的賭。孔子說：「未知生，焉知死？」連今天都未能做好，如何去指望未來呢？

不用科學化思維去計劃投資，反而變成宗教狂熱份子一樣天天望發達無風險，如果真的可以無風險等發達，我想金融海嘯是永世都不會發生，所有股票都只會升不會跌了，但現實如何，宗教狂熱份子當然不會理會。

現金0.26%

倉位本年股本回報-3.48%。跑嬴恆指14.21%。跑嬴國指15.11%。